旅行。攝影: Day 1 - 4 : Tirana (Albania)

今次行程是由 Pauline 和 Beatrice 兩位規劃，因為我遲了確定參加，她們乘搭的航班機票脹價了二千多，在網上搜羅到另一飛行路線的機票比較平，但要多停一個轉機點，也需要提早一天出發。

訂好機票準備起行，跟家人說出將會旅遊的國家名稱時，看到他們的面上出現很多問號，問我：「又是那些鬼地方嗎？」

No No No ... 不是鬼地方，這幾個國家就在意大利右手邊！

Day 1 : 26-06-2014 (Thu)

Hong Kong --> Amsterdam --> Rome

KL 0888 12:30/18:45 Hong Kong-->Amsterdam

KL 1609 20:25/22:35 Amsterdam-->Rome

在香港機場做自助 check-in 失敗，唯有去櫃台排隊，花了近半小時終於輪到我。地勤問我最近半年係咪去過歐洲，我答〝沒有〞，但去年去過加拿大，咁都搞到我唔可以自助 check-in？我要停兩個點轉機，行李會去到最終站 Tirana 才提取。

第一程機要飛十一個鐘，攞唔到靠走廊座位，仲畀兩位高大鬼佬一左一右夾喺中間！ X_X 好彩座位夠闊，都可以瞓得好舒服！看了 The Lego Movie 和睡了五小時，到咗阿姆斯特丹！由 Gate E 行去 Gate C 轉機，中間要經 Immigration 和安檢。安檢時被要求打開背囊逐件物品檢查，連相機的軟墊都不放過。所有物品亂晒，即係要我重新整理背囊，大佬 ... 我趕著轉機0架！

飛羅馬呢程機攞到靠走廊座位，今次換成兩位中國女子夾著鬼仔坐中間！ ^_^ 到咗羅馬機場又行了好遠好遠去 Gate H 等明早的航班飛去 Tirana。羅馬機場提供 free wifi，上網 FB 一下，睇 whatsapp 和追下劇，夜瀾人靜其他候機的旅客都找有利位置宿一宵，我也學他們把椅子拚在一起瞓一陣。

Day 2 : 27-06-2014 (Fri)

Rome --> Tirana, Albania

KL 3591 09:20/10:50 Rome-->Tirana

飛 Tirana 的航班準時起飛，有七乘旅客是本地人，可能無咩香港人嚟玩，過海關時花了一點時間，又係查來查去唔知香港喺邊啦！關員問我有無 visa，我回答唔使 visa 0架，佢又搵咗一輪，最後點頭 ... 找到了！

來到行李輸送帶見有大堆旅客在等，旁邊的 money exchange 反而無咩人，便先去換錢。兌換率 Euro 1 : 135.3 Leke，比網上查到的兌換率差一點。換完錢返回行李輸送帶剛好我的行李喼轆過，習慣檢查行李喼一下，發現我的鎖頭失蹤了 ... 我頂 ... 一定係意大利佬的所作所為，以為三個羅漢果是手榴彈嗎？！打開行李看看，當然被翻至亂晒龍，大庭廣眾唔方便遂樣 check，真係好嬲，剪我鎖，嗰個鎖我好鍾意0架！

步出機場按指示找到往市中心的小巴，正點開車，車費 250 Leke，司機會在開車前向乘客收費及發一張發票。這班車座位全滿還要企位，正值中午時分非常熱，車箱內的空調又弱雞，我攞把扇出嚟撥，坐在我旁邊的老婆婆伸出母指表示 like ... 咁我撥埋畀佢啦 ~~

車程約30分鐘在終點站下車 (在 museum 附近)，老婆婆拍拍我的膀頭揮揮手道別。攞出 hostel 地址請司機指示 hostel 所在的方向，按 Beatrice 早前給我的提示，很快便找到 hostel 坐落的路口，就在 Tirana International Hotel 的背後。再在路口問當地人，原來要一直走到街尾。

Freddy 很親切見我大汗淋漓，便先帶我到房間安頓好行李，我問他是否要辦入住登記，他說不用著急請我慢慢安頓好休息夠才辦，我也不客氣先去整理行李，打開行李逐一檢查，好彩無唔見嘢！沖完涼出去找 Freddy 做 check-in，可是他走開了，我便外出探索附近環境，找超市找換錢的地方。畀我搵到一間兌換店的兌換率是 Euro 1 : 140 Leke，慳得一蚊得一蚊，明天來換錢。

行咗一陣食過小食買了點水果，天陰陰又行雷閃電，便回 hostel 避雨兼午睡。實在太累了 ... 一直瞓到六點半才起床外出搵食，星期五晚街上很熱鬧，cafe 座無空席。行來行去唔知食咩好，見到有間七仔便入去睇下，咪誤會七仔是便利店，其實這間七仔是賣 pizza & coffee。

上面嗰款味道較濃，我喜歡下面較多芝士的 pizza，我當然食唔晒啦 ... 食剩兩小塊！

食完晚餐八點仲未天黑，又行去遊樂場睇下，行到九點便回 hostel 休息。 Freddy 未返只有一位伯伯係度，我便問他是否要辦入住登記，他點頭取了我的護照，房租我付歐羅，但伯伯沒有零錢找續，伯伯說明天早餐時才收房租啦~~ 哈哈 ... 佢講個信字唔怕我走咗去！

今晚只有我一個人入住這間三人間，哈哈 ... 17 歐羅獨佔一間大房。房間靠近大門口的路邊，這裡有一個陽台，伯伯和一位男子坐在陽台飲咖啡聊天至十二點幾，不時有住客開門進出 hostel 也發出聲響，所以也影響到我的睡眠。

住宿：Freddy's Hostel (3 persons female dormitory, Euro 17/person/night, incl breakfast)
Freddy 很友善有問必答，會要求每位住客照相留念。三人間內有浴室洗手間，房間空間尚可，十分整潔，有空調及有穩定 free wifi。只有 Freddy 能以英語溝通，其他職員只能以簡單英語和身體語言溝通，所以最好趁 Freddy 值班的時候查詢所需資料。

Day 3 : 28-06-2014 (Sat)

Tirana, Albania

早上六點幾已天亮，瞓到八點起床到大廳食早餐。 Freddy 正在廚房忙著煎蛋，他為我沖了一杯咖啡，食物放在長枱上可隨意享用。這裡的早餐也很讚，有朱古力醬牛角包、麵包、煎蛋、生蕃茄、青瓜，芝士、果醬和橙汁。

早餐後付房租給 Freddy，昨日已跟 Freddy 溝通了 Beatrice 訂了兩晚三人房，他說那房間可於十點準備好。我便回房間收拾行李和休息下，預鬆時間十點半才找 Freddy，他面有難色，Freddy 話房客昨晚深夜才到達，佢哋依家仲瞓緊，為表歉意佢將我哋 upgrade 去一間兩房 apartment，呵呵 ... 大發！

很欣賞 Freddy 的服務態度，除咗畀個 like 佢，我送咗個港幣兩蚊畀佢，Freddy 很高興。 Freddy 幫我搬行李上另一棟樓的二樓，房間內有位嬸嬸在打掃，她著我坐在梳化倒了兩杯橙汁與我碰杯一飲而盡，當地人真的很友善和親切。

Pauline 和 Beatrice 在十二點半到達 hostel，Freddy 幫佢哋搬行李上來。等她們梳洗完休息夠下午二點出發去 National History Museum (入場費 200 Leke)，中午時分最好在室內避太陽，裡面的展品值得慢慢欣賞。中午一點至下午四點是最曬最熱的時段，在大太陽下又乾又熱如同乾煎蝦碌，所以這段時間街上很少人和車。晚上六點後，街上便會熱鬧起來。

四點鐘行去 National Art Gallery，行錯路但發現另外一個有趣景點 ... 荒廢現代金字塔，外牆很斜但當地人仍可輕易行上去。

National Art Gallery (入場費 200 Leke) 比較碎料花半小時便睇完，大家沒有食午餐看見雪榚很吸引於是齊齊入一球 (每球 40 Leke ... 平到笑)，Beatrice 付錢的時候不小心將 50 Leke 硬幣掉進雪榚櫃與門面玻璃之間的空隙，售貨員將雪榚遞給 Beatrice 又問佢跌咗幾錢，最後店員沒有問 Beatrice 收錢還找回 10 Leke，真係均真兼老實。從 LP 中找到一間推介餐廳 Era 就在附近，便提早食晚飯。